नारायणगढ, ७ असार । भरतपुर अस्पतालमा थालेसिमियाका ५२ जना विरामीहरूले निःशुल्क उपचार लिदै आएका छन् । उनीहरुको उपचार खर्च भरतपुर अस्पताल विकास समितिले आफैले व्यहोर्ने गरेको छ ।
थालेसिमियाका विरामीहरूलाई १५÷१५ दिनमा रगत दिनुपर्ने हुन्छ । अस्पतालले हरेक विरामीलाई महिनामा दुई पोका रगत र औषधि उपलब्ध गराउदै आएको सामाजिक सेवाका प्रमुख नारायण सापकोटाले जानकारी दिए ।
“आर्थिक रुपमा कमजोर व्यक्तिलाई नियमित रूपमा उपचार गराउन समस्या पर्ने भएकोले अस्पतालले निःशुल्क परीक्षण, औषधि र रगतको व्यवस्था गरिएको छ” सामाजिक सेवा प्रमुख सापकोटाले भने, “थालेसिमिया सोसाइटीको परिचय पत्रका आधारमा उनीहरूलाई सेवा प्रदान गरिन्छ ।”
थालेसिमियाका विरामीहरूलाई अस्पतालले निःशुल्क रगत उपलब्ध गराए पनि उसले रक्त सञ्चार केन्द्रलाई भने बार्षिक रुपमा करिव पाँच लाख रकम बुझाउँछ । रक्त सञ्चार केन्द्र भरतपुरले प्रतिपोका रगतको आठ सय ५० रुपैयाँ लिने गरेको छ ।
“थालेसिमियाका विरामीहरुमा बोनम्यारो ट्रान्सप्लान्ट गर्नु नै अन्तिम बिकल्प हो’ अस्पतालका मेडिकल सुपरिटेण्डन्ट डा. रूद्रप्रसाद मरासिनीले भने, “तर उक्त सेवा नेपालमा नै उपलब्ध नभएको र बिदेशमा गएर ट्रान्सप्लान्ट गर्न महंगो पर्ने भएकाले विरामीहरुलाई मासिक रुपमा रगत दिनुपर्ने अवस्था छ ।”
भरतपुर अस्पतालमा एक बर्षको बच्चादेखि ४५ बर्ष उमेरसम्मका विरामीहरूले निःशुल्क उपचार लिंदै आएका छन् । जसमा महिला १६ जना र पुरुष ३६ जना छन् । तीमध्ये चितवनका ३५, नवलपरासीका १२, बाराका दुई, गोरखा, सर्लाही र बर्दियाका एक÷एक जना छन् ।
नियमित रूपमा उपचार गराउदै आएका थालेसिमियिाका विरामीमध्ये ३० जना थारू जातिका छन् । “थारू जातिमा बढी मात्रामा थालेसिमिया र सिकलसेल एनिमिया हुने गरेको पाइन्छ” भरतपुर अस्पताल फिजिसियन डा. भोजराज अधिकारीले भने, “हेमोग्लोविन बनाउने क्रोमोजोममा हुने गड्बडी जेनेटिक कारणबाट हुने भएकोले यस्तो समस्या आएको हो ।”
समाचार