Sun01212018

Last update01:57:25 AM

Back You are here: Home साहित्य भाग्यले बाँचेकाहरु हेर्न पाइने

साहित्य

भाग्यले बाँचेकाहरु हेर्न पाइने

नारायणगढ, ३० साउन । प्रेस चौतारी चितवनले पत्रकार कल्याणकारी कोष स्थापनाका लागि भदौ १४ गते नारायणगढमा भाग्यले बाँचेकाहरु नामक वृत्तचित्र प्रदर्शन गर्ने भएको छ ।
पत्रकार गणेश पाण्डेद्वारा निर्देशित वृत्तचित्र भाग्यले बाँचेकाहरूको प्रदर्शनीबाट उठेको रकम पत्रकार कल्याणकारी कोषमा राखिनेछ । वृत्तचित्रमा धरहरा ढल्दै गरेको प्रत्यक्ष भिडियोदेखि बैशाख १२ गतेको महाभूकम्पमा परेर बाँच्न सफल सात जनाको कथालाई समेटिएको छ । यसको निर्माण शारदा गैरे, छायाँकन विनोद विष्ट, सम्पादन कुमार शाह, लेखन दीपक कोइराला र अंग्रेजी अनुवाद विकास बस्नेतले गरेका छन् ।
साइन मिडिया प्रालिद्वारा निर्मित वृत्तचित्रमा जुगल डंगोलले संगीत भरेका छन् भने सम्राट मुभिजले पोष्ट प्रडक्सन गरेको छ । डकुमेन्ट्रीमा बैशाख १२ को विनाशकारी भूकम्पमा परेर पनि आश्चर्यजनक रुपमा नयाँ जीवन पाएका सात जना लगायत अन्य नेपालीहरुको कथा छ ।
काठमाडौँको सुन्धारास्थित काठमाडौँ मल अगाडि ट्राफिक प्रहरी करण भण्डारीलाई बचाउने हिरामाया नेपाली, पाँचतले घरले पुरिएर २२ घण्टापछि जीवितै उद्दार गरिएका भक्तपुरका सोनिस अवाल, सोनिसलाई जीवितै उद्दार गर्ने नेपाली सेनाका सुबेदार दीपक राई र सिपाही विकास केसीको कथा वृत्तचित्रमा समेटिएको छ । यसैगरी, धराहराबाट खसेर बाँच्न सफल लमजुङकी बबिता सेढाई, काठमाडौँको नयाँ बसपार्कबाट १ सय १२ घण्टापछि सकुशल उद्धार गरिएका नुवाकोटका पेम्बा तामाङ, काठमाडौँको बसपार्कमै सात तले घरले थिचिँदा ८२ घण्टासम्म आफ्नै पिसाब खाएर बाँचेका अर्घाखाँचीका ऋषि खनालको कथा वृत्तचित्रमा छ ।
काठमाडौँको बसपार्कमै होटलमा किचिएर दुबै खुट्टा गुमाएका दैलेख बाँसीका रमेश खत्री, भूकम्प आएपछि इनारमा पुरिएपछि जीवितै उद्धार गरिएकी भक्तपुरकी ७५ बर्षीया शिवकुमारी खागी, आफ्नै बाबुले सिकाए अनुसार भूकम्प आएपछि खाटमुनि छिरेर जीवन गुमाएकी नुवाकोट तुप्चेकी उत्सना शर्मा र काठमाडौँको काभ्रेस्थलीमा छिमेकीको घरले किच्दा एउटा खुट्टा गुमाएकी मकवानपुरकी प्रिया विकको पीडादायी कथा वृत्तचित्रमा हेर्न पाइन्छ ।
भूकम्पमा परेकालाई जीवितै उद्धार गरेर वाहवाही कमाएका सशस्त्र प्रहरी निरीक्षक लक्ष्मण बस्नेत, नेपाल प्रहरीका निरीक्षक प्रदीप क्षेत्री र एउटै चितामा पाँच–सात जनाको शव जलाउनु पर्दा विक्षिप्त बनेका भक्तपुरका सविन ख्याँजुको कथा–व्यथादेखि भूकम्प मापन केन्द्रका प्रमुख लोकविजय अधिकारी तथा १९९० साल र २०७२ सालका दुई ठूला भूकम्प देखेका राष्ट्रकवि माधवप्रसाद घिमिरेसम्मका अनुभवलाई पर्दामा उतारिएको छ ।